I 2020 var det 25 år sidan Triakel heldt sin fyrste konsert, og det skulle feirast, men me veit alle korleis det gjekk. Nok om det, no er det på tide å feire den herlege trioen frå nabolandet i aust, me feirar Triakel 27 år!

Frå oppstarten tok det tre år før den sjølvtitulerte skiva Triakel kom ut, eit meisterverk av ei debutplate! Sidan har trioen gjeve ut fire skiver samt singelen “Innan Gryningen”, som dei gjorde saman med Benny Andersson frå ABBA i 1999, som også bør nevnast i diskografien.

 Dei tre musikarane er alle godt etablerte i den svenske folkemusikkeliten etter mange år med ulike band og prosjekt. Alt frå Hoven Droven og Garmarna til Bo Lyckligs Orkester syslar dei med på fritida si, men det er gjennom Triakel dei får utspring for både dei humoristiske og mørke, men samstundes sentimentale og lyriske sidene sine.

 Trioen har turnert over store delar av Europa samt Japan, Canada og USA og har spelt store mengder konsertar her i landet. Me som har opplevd Triakel mange gonger før gler oss likevel som aldri før til å høyre dei att, og til dei som eventuelt ikkje har fått dei med seg på konsert enno: No har de høve til å få eit nytt favorittband!

 Emma Härdelin – song, fele
Janne Strömstedt – trøorgel
Kjell-Erik Eriksson – fele