Will og Jenn møttest tilfeldig under ein session i 2018, som leia til at denne særs kompetente og virtuose duoen vart ein realitet. Med røtene djupt planta i engelsk og skotsk folkemusikktradisjon, blanda med inspirasjon frå blues, sigøynerjazz og all verdas folkemusikk, har dei to musisert seg viralt på internett.
Will og Jenn er båe to djupt respekterte utøvarar på sine respektive instrument, og har vunne eller vorte nominert til prisar som BBC Radio 2 Folk Awards, FATEA, Songlines og ScotsTrad Music Awards. Dei har spelt med dei fleste av dei store navna og gruppene innanfor folksegmentet i Storbritannia, og no kjem dei altså til oss i duoformat!
Will Pound - munnspel, torader
Jenn Butterworth - gitar, vokal
Suigard er ein ny duo i spagat mellom tradisjon og nyskaping. Duoen består av Vegard Hosarøygard frå Lom på gitar, og Sunniva Langås-Røiland frå Bø på hardingfele. Båe er studentar ved Noregs musikkhøgskule, der dei møttest hausten 2024 og raskt byrja samspelet. Suigard komponerer musikken sjølv, med eit særskild fokus på dansetakt. Repertoaret leiker med kontrastane mellom nytt og gamalt – noko som og speiler seg i ei litt uvanleg besetning. Med Suigard får du ei musikalsk oppleving i ny tradisjon - som får det til å rykkje i dansefoten.
